倫伯（當年）真係好撚紅

  Day 54，最愛的你 冇錯，又係私心選。亦係《愛情陷阱》隻碟。隻碟就紅到不得了，所以連帶啲side track都人人識。但後生就未必識其他side track 實情呢首歌一路係有啲怪的，你覺得真係唔係好啱倫伯。因為首歌好高音下。 作曲嘅，正係《愛的替身》《雨夜的浪漫》《霧之戀》嘅鈴木喜三郎。呢首就真係改編歌。 原曲　倉橋盧伊子嘅 ラストシーンに愛をこめて（維基如是說），後來中山美穗都翻唱過。不過，真係鍾意倫伯版多啲，主要都係編曲。但當然倫伯男人聲唱，就怪怪地。 填詞嘅，同同碟《此刻你在何處》一樣，都係林敏聰，但就《此刻你在何處》填得好啲了   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 53，此刻你在何處 又係私心選，亦係嗰種「分到你係咪嗰個年代」嘅歌。例如咩《一生中最愛》之類，三十歲甚至廿歲都識唔奇。但我估四十歲以下嘅，應該唔會識今次呢隻。 但掉轉，如果我年代嘅，就應該實會識 雖然首歌唔算好紅，但隻碟真係好紅！！！！ 冇錯，正係《愛情陷阱》。而嗰個年代，聽歌仲係成隻碟咁聽的。 呢首真係私心選，芹澤廣明作曲，編曲做得很好。 填詞嘅林敏聰亦都填得好。 先由主人翁出發 咀巴　就　　綠綠的杯 指尖　就　　弄著煙灰 然後zoom out，天花，耀眼燈光，成個畫面出晒嚟 最正係，個MV真係整個 綠綠的杯！倫伯就真係弄著煙灰。 可見當時真係比較尊重填詞人（又或者話，要畫出腸。正如你睇許冠傑《日本娃娃》，就真係要東急，就真係有中森明菜有日本爸爸，就真係有柴色太陽鏡。爭在唔知嗰架係咪真係Toyota） 再zoom out， 海　就　寂寞的港　（我知文法上有啲問題，但是但） 淚　就　靜靜的淌 然後先講，因你在這一刻　不再在我旁 第二段嘅 落寞　在面上漸漸結聚 寂寞　在心底默默作祟 亦係填得好 聽日會貼多首，都係呢隻碟。忙，煮定幾日嘅嘢。話埋你知，過年一定係貼《恭喜發財》   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 52，天地初開情已在 其實，我係咪倫迷？好似唔少歌都好多人話唔識。不過正常嘅，實情我啲音樂口味比較老派，如果同我同年嘅，應該最鍾意真係四大天王。張國榮倫伯呢啲太早了。 講返，唔好見個MV字型好似好舊式，又有向雪懷填詞。實情係相當後期嘅作品，1995年。你諗下，1995年基本上係李克勤收咗檔嘅年代，嗰年個演唱會仆直，然後頹咗幾年，在無線主持奧運呀，勁歌金曲呀，世界盃就係嗰幾年。 又，作曲係倫伯自己。佢都真係作唔少曲，真係多過好多同期嘅歌手。係咪只靠日本歌？ MV女主角……蔡少芬？   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 51，凌晨一吻 第51日，搵首冷門嘅歌。 呢首歌，我原本係完全唔識的。 點解會忽然識？ 因為，有條友將自己個名，改咗做「凌晨一吻」！當然係合法的，正如你可以改做「中出羊子」 我覺得佢都幾出名，因為佢有自己嘅維基百科條目！我都未有呀！（？） 呢條友奇怪在，佢1967年出世，即係55歲．咁佢鍾意倫伯唔奇，但佢係去到2004年先改名的。話想改個日本名，而我唔知點解「凌晨一吻」係日本名。 冇MV，但睇隻碟嘅設計都知，係後期嘅歌了。1990年了，《夢幻舞台》。1987年佢已經唔攞獎，但呢隻碟都仲plug 6首歌，包括《卡拉永遠OK》。唔止，同年佢仲有出第二隻碟，《世外桃源》，即係《理想與和平》。唔知李克勤有咩感想，然後過多兩年倫伯真係叫做退下來（但依然一隻碟plug 6），就到四大天王了。 呢首就改編歌，作曲嘅山本英美，唔識。填詞盧永強，填過下其他詞，但亦都唔識。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 50，也曾相識 嚟到第50日，呢首亦係私心選，個人相當鍾意。不過應該都算流行？而我係冇呢隻碟的，不過有個同學成日唱「懷著千般失望　千般失落　一再去淫蕩」 比較後期嘅歌，1990年，《世外桃源》隻碟，即係《理想與和平》。   個MV，陳秀雯。新加坡定馬來西亞？搞乜？定係倫伯嗰期拍緊《驚天12小時》？ 又，TVB插曲，套劇叫《午夜太陽》，只係記得個名，完全冇印象睇過，所以唔關TVB事。套劇仲值得一講，但最尾先講，唔想失焦。     我應該好近期先留意到，呢首歌原唱係巫啟賢（陰功，我都買過幾隻佢嘅碟），嗰幾年香港都改好多佢嘅歌，張學友都唔少。 原曲係巫啟賢嘅《你是我的唯一》，佢自己作曲。唔好搞錯王力宏嗰首。呢度貼埋畀你 冇錯，當然又係比較原曲同改編。 咁你講食力，真係唔使討論，當然係巫啟賢勝一籌。但fuck that 香港人好重視實力啦，巫生都係冇乜點紅過。但叫做賣得下碟，錢就搵到啲，攬過下楊采妮，同埋賺咗名氣，而家繼續可以返大陸做老師指點江山。 唔止講食力，仲有睇埋演繹。倫伯係唱得hea的，你可以留意下巫啟賢啲運氣呀，撚聲呀，輕重呀，多變好多。所以除咗食力，當然你可以話係敬唔敬業嘅分別，但我覺得亦係上咗神枱，同未上位嘅分別。洛奇都榮華富貴啦，仲邊有窮黑人Mr T嗰啲飢餓感？ 留意下巫啟賢唱副歌，「這樣的結局」「的埋怨和悔意」（即係倫伯唱「一再去流浪」「匆匆再次回望」），係撚得好好聽的。特別係最後「結」「悔」嗰兩下音，你可以拍埋倫伯「流」「回」度聽下 不過，不幸地，二揀一我都係揀倫伯。除咗先入為主，仲有兩個原因 咁你估到了，既然歌者同埋演繹都原曲好啲，咁當然係剩返嘅地方出問題。就係編曲同填詞。 原曲嘅編曲，係比較簡單嘅。但又似乎鋼琴唔多夠。 但當然，最大問題都係填詞。 一路嘅偏見，都係唔太鍾意啲友一個字連幾個音。咁你見呢首亦係。當然亦可能係普通話同廣東話分別 「當年從頭識過」，原曲係「選擇了逃～避」。然後副歌更明顯，「曾經努力過」原曲係「我的最～初」，「曾經相識過」原曲係「我的最～終」，「所得幾多」係「唯～～一」 仲有，亦係偏見，但我唔鍾意啲填詞人太懶。副歌要洗腦上口我明，但其他位最好唔好重覆。 呢首歌，十分典型嘅「開首，轉折，副歌」 好啦，原曲，開頭已經用兩次「很想給你寫封信」，算，忍你，當你想強調。同樣地，副歌最尾係「雖然你是我的最初　雖然你是我的最終　雖然

Day 49，柔柔河畔。 有啲力不從心，可能玩到50日唔玩。唔係冇歌，係每日都用咗我時間。 睇樣都知好早期嘅歌，聽歌亦都知。早期民歌風情。 寫明係《愛人‧女神》隻碟，1982年，極早期，未算好紅。成隻碟只係plug一隻歌，係之前貼過嘅《雨絲‧情愁》。 留意再對上一隻碟係《忘不了你》，跑出咗，可以講係帶動咗全香港改編日文歌嘅風潮。再之前啲碟？係改編英文歌的，咪許冠傑咁。 所以呢隻碟係《忘不了你》後，斬多幾兩，再改編日本歌。《雨絲‧情愁》同《忘不了你》都係五輪真弓。 That said，呢首　柔柔河畔，就全本地創作。填詞林振強。 作曲嘅，歷風。之前貼過嘅《相識非偶然》都係佢。睇到個民歌風格的，區瑞強嘅《陌上歸人》都係佢。 歷風乜水？就係馮添枝。當年唔知，而家知，甚至知個名點嚟。Ricky Fung嘛。監製當然係佢中學同學，關維麟，作曲時就用　威林做筆名。估到啦，William Kwan 話倫伯靠改編日文歌，我係有啲保留嘅。暫時我貼嘅歌都係早期嘅多，咁肯定後期仲寫。但我數一數，日本人作曲嘅，13/49，三份一，睇你點睇。我甚至已經計埋芹澤廣明入江純特登幫佢作嗰啲，雖然嗰啲根本唔係改編歌。 至於本地創作？26首，過一半喎。倫伯自己作曲都有6首。其他嘅？咪英文，意大利文，仲有韓文。 即係，呢啲比例算定少，任你講。但，all due respect，改編日本歌嘅數目，應該點都少過後來李克勤張學友之類吧。而倫伯作曲嘅數目，點都多過晒四大天王張國榮梅艷芳之類。 再講一次，唔係話純Performer就低層次啲。但啲小朋友講到倫伯樣又衰　歌又難聽　唔識音樂　只係靠改編日本歌。我就真係有啲黑人問號。     我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 48，都市戀歌 1984年，早期嘅碟，《愛的根源》 個MV幾堪玩味，留意當時倫伯仲係　花靚仔形象。1984年嘛。間Pizza Hut…….仲有，杯橙汁好撚橙，好多色素。 女主角係邊個？ 作詞林敏聰，但我想作曲嘅「威林」，即係關維麟（當然我好多年後先知） 關維麟乜水？只能講句，真係教父級。倫伯早期御用監製，歌都作埋。 關維麟阿哥叫關維鵬，乜水？即係泰迪羅賓。關維麟細佬叫關偉，亦係寶麗金高層。 唔止，佢三兄弟一齊夾Band，隊Band叫Teddy Robin and the Playboys（當然用泰迪羅賓行先，大哥嘛）。 仲有乜水？鄭東漢。應該識啦？真係唔識？佢個仔叫鄭中基。 唔止，關維麟個仔，叫關楚耀。咁所以點解倫伯咁睇關楚耀。人地啲幾廿年友情，冇嘢講。 仲有，馮添枝亦都係關維麟中學同學。 於是你發現，刁，嚟嚟去去嗰班友圍威喂。唔好忘記，倫伯同曾志偉老豆又係frd（齊齊踢波！），後來又係曾志偉介紹倫伯去新藝城，識埋黃百嗚等等。 但，係咪真係嚟嚟去去嗰班友圍威喂？Yes and No 其實你懂的，機會多，而競爭細。當年香港有幾多人？社會由窮變到中產，開始有「身份認同」，由許冠傑帶領（所以佢係歌神，唔止係因為佢啲歌紅或佢點靚仔點叻，雖然佢都係）。 最重要係，由零開始呀。上面冇一堆廢老。你打工都仲話上面有條鬼佬，但鬼佬唔識玩廣東歌拍港產片嘛，所以任你玩。既偶然又必然。 咁你到後來，關楚耀鄭中基嗰代，就唔係嗰位事啦。上面嘅又未走，無啦啦做乜要畀你走？人地其他地方又開始興起。 你諗下倫伯年代，大陸窮到未有錢著褲，台灣韓國不入流。係得日本之嘛。冇錯，有歐美，但，你嗰時邊有得上YouTube？況且，嗰時你估人人識英文咩。讀番書嘅，例如我老豆老母嗰啲，會識，但，仲有啲三四十歲嘅，咁唔聽許冠傑倫伯，可以聽乜？ 所以早十年八年，人人飛機當年啲流行文化點巴閉，我又會話你知，你嗰時冇選擇啫。況且好多嘢都係照抄人地，當年好易過骨 況且，當年市場大，budget大，你啲創作人亦試到好多嘢，相輔相成的。你諗下嗰時拍咩「龍兄虎弟」幾撚咁大陣仗。咁你後來啲創作人，好多時只係粒螺絲，都冇乜可以擔過大旗，又冇計 加上，個量亦都大。你睇咩盧東尼嗰啲，大佬，一年編幾多隻歌？林敏聰林振強一年填幾多詞？真係工多藝熟。 咁但又that said，當年個市場係易玩。但又唔係個個紅

Day 47．愛情陷阱 貼咗幾日啲冇咁紅嘅歌，冇乜人理（其實我心中都未算冷門，我諗我真係倫迷，不認不認還須認），咁唯有貼返啲Hit歌 呢首，真係不用多講了吧。早排倫伯食粉絲事件，大家即時諗到嘅都係呢首歌，可見有幾紅。 作曲嘅係芹澤廣明，唔係改編歌，呢首歌後佢當然聲名大噪，之後玩咗幾隻碟　—但亦只係幾隻碟而已，《暴風女神Lorelei》失利後，就開始淡出。可見即時係識人好過識字，圍威喂有人情味，你話倫伯已經唱乜都有人買都好，冇成績嘅一樣即時起身，世界永遠都咁殘酷（當然亦可能因為佢係日本人，或者日本仲好景） 關於呢首歌嘅reference，至少仲有兩個。好多人都知嘅，陳奕迅《重口味》向呢首歌致敬。MV模彷80年代風格（見唔見啲煙？同埋啲Disco燈），仲在編曲中插咗一段。 另外，我覺得更加正嘅係，《秋天的童話》． 陳百強（Vincent）：Woody Allen講過，愛情要好似條鯊魚咁不停向前游，唔係會死㗎 周潤發（船頭尺）：阿倫幾時有咁樣講過呢？阿倫只係話「這陷阱　這陷阱　偏我遇上之嘛」 但我係過咗幾年（唏我冇咁老），先get到呢個gag。細個鬼識邊個Woody Allen咩。呢幕戲真係好頂癮，編導將懶文青嘅嘢同市井野炒埋一齊，同時間又突顯到兩個角色點樣係兩個世界。但我懷疑，當年都唔係好多人識笑。（而，當然Woody Allen真係有咁講過， Annie Hall嘛： relationship, I think, is like a shark, you know? It has to constantly move forward or it dies。但我當然好多年後先知）   又，NetFlix好似有得睇返，For 新一代。趕時間嘅，呢度， 45秒 首歌，冇得好講。但我有限嘅見解，覺得首歌唔係你一聽就覺得「爆紅」嗰種。旋律並唔係特別易上口，唔係好「洗腦」，特別係未入副歌之前。甚至唔少人只係識唱副歌，因為副歌之外，填啲詞亦有啲撓口 但，個副歌就真係無敵啦。句「我墮入情網　你卻在網外看」，老套講句，經典。仲有衍生出嚟嘅「我墮入元朗　你卻在大排檔」。以及「這陷阱　這陷阱　偏我遇上」 順手講埋，MV女主角，唔識，死埋了，50歲唔夠，只能講句紅顏薄命（雖然女人平均長命過男人）。但都係唔識，全無印象。 女主角王敏明，留意張國榮嘅《Monica》同倫伯嘅《愛的

Day 46，創造命運 亦係比較早期嘅作品，《霧之戀》隻碟，1984年。但後來演唱會都有唱。 正如介紹有講，電影主題曲，套戲叫《上天救命》，相對地唔係太出名嘅戲。至少冇《小生怕怕》或《愛人　女神》甚至《恭喜發財》咁出名 但冇錯，呢套亦係新藝城嘅戲。不過冇倫伯份，主演嘅係鍾楚紅，同埋…..曾志偉。基本上係曾志偉介紹倫伯去新藝城嘅。 咁所以你估到了，呢首歌填詞嘅，又係黃百鳴。之前《小生怕怕》同《我愛世界》都係佢。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 45．千年埋藏 私心選，相當鍾意佢嘅編曲，特別副歌部份。作曲入江純，亦即係之前貼過，作《計時炸彈》嗰個。同一隻碟，《牆上的肖像》 呢兩首歌都好似冇Plug過上台，但我都識。係咪好流行？又唔知，好可能因為我屋企有，日聽夜聽。但嗰隻碟都Plug咗六首歌上台，包括之前貼過嘅《痴心的廢墟》同埋《曾經》。 留意隻碟並唔係太賣得，因為嗰時已經係差不多神枱期。隻碟1987年，年尾就宣佈唔攞獎了。另外之前都有講，當時倫伯已經走出香港，轉咗去拍戲同埋開巡迴演唱會。出本地碟相對地唔係首要任務。 正係因為倫伯打日本市場，呢首歌居然係有……英文版的。倫伯甚至在東京音樂節唱，所以我好記得。。 但當然英文版得啖笑。 又，目測　陳百強同張國榮在東京音樂節都係唱返廣東話，好合理。許冠傑當年有唱過英文，但反正許冠傑自己啲歌都英文。倫伯就真係因為出咗隻碟有英文版。 而邊個唱過日文歌？就係…..梅艷芳。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 44，霧之戀 應該，真係不用多講吧。照計數倫伯五大金曲都會收到呢首，甚至可能係好多人心中嘅三大，甚至最愛。 冇錯係改編歌，鈴木キサブロー（喜三郎？），同《愛的替身》同一人（實情係同一隻碟）。都話當年好期待頒獎禮會點講，結果Dodo姐都係就咁講 「作曲鈴木」 隻碟就係《霧之戀》，之前嗰日嘅《亮了紅燈》都係呢隻碟，1984年，大紅大紫之時。 日文版我都聽過，唱就原版好啲，但成首歌，就真係鍾意倫伯版多啲，啲音有些少分別的。留意「你永在我心」，原版係得兩個音的。 當然仲有係填詞嘅林敏聰，嗰期佢都話自己無敵，仲有《幻影》。以霧為喻，當年呢種手法都唔係好常見。如霧起～暗暗蓋掩身邊你 像霧裡～面前幻化不定，填得很好。 雖然，個「閃礫」係填錯咗的，之前寫《夏日寒風》都講過，香港四個填詞人集體中邪填詞呢個字，橫跨十幾年，十分奇怪。 呀，MV，特登揀呢個的。原版有個陳秀珠版本，但我特登揀呢個。你睇MV就倫伯變老真係變咗倫伯。現實係七十歲仲有心有力後生過你同我，科技真好，有錢真好，羊胎素真好。 呀仲有，當年李克勤參加十九區，就係唱呢首歌。     我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 43，亮了紅燈 私心選，好似冇plug上台，但照計嗰個年代嘅會識。後來演唱會都有唱過下（實情好多歌佢都有唱過） MV就真係整個紅燈，仲有…..劉嘉玲？ 作曲嘅係蔡國權，之前都講過，佢作曲好有個人風格，中式小調。不過呢首唔係，甚至唔係好似本地歌。但保留咗蔡國權作曲啲音域唔會太廣嘅特色（並唔係佢唱唔到，況且，好多歌都唔係佢自己唱） 又，三十歲以下嘅，怕且唔知邊個蔡國權（可能當咗佢係OK仔老豆，當然亦都冇人記得OK仔老豆叫乜名）（＊） 不過，蔡國權真係作好多好多歌，別人的歌。有啲似吳國敬咁，不過更多。 咁而兩個一樣，都係紅唔起嘅。原因？當然都係外在有啲關係。但你話倫伯好靚仔咩？又好似唔係，至少當年我啲阿姨一致認為阿B靚仔啲。咁又其實唔代表靚仔靚女實紅，「咁話你楊千嬅靚唔靚女丫？」（咁但，肯定倫伯自己嘅音樂水平高過楊小姐幾條街先） （＊）Touchwood 有一日彭健新過身，段生平簡介除咗會有溫拿，都實會有OK仔。甚至有人話，佢死咗段新聞都冇OK仔死咗咁多人關心。「都唔知好嬲定好笑」。又，我一問我老婆知唔知咩係OK仔佢就知，但問佢個主人叫咩名，老婆都諗咗好耐，話……「溫拿嗰個」，但最後答講到「彭健新」。我以前女朋友（後生過埃汾太少少），就真係講嚟講去都講唔出，只係不停做比劃，「戴個膠眼鏡嗰個……..咩仔…….咩仔！」     我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 42，玩出火 1988年，《迷惑》隻碟。你應該睇到識背，倫伯係1987年宣佈唔再攞獎嘅。呢隻碟風格幾特別。 MV女主角係關秀媚，「冇乜睇頭」。 首歌都紅過下，倫伯食粉絲事件後都有人拎呢首歌贈興。但美麗的誤會啦，「佢同Wendy先真係玩出火」 作曲嘅日本人，唔係好搵到資料，但應唔係改編歌。填詞陳少琪。 曲式方面都有啲新意，AAB AAB CC 咁，唔算太常見。留意首歌相當短，加埋唔少嘅間奏，唱嘅有冇兩分鐘？（數咗，係有嘅） 歌詞填得不錯，交代晒成個故事，就係條仔被愛傷害，然後做玩家，點知又再遇到個令佢動心嘅，就出事。「咁所以擺明唔係大陸女粉絲」 填詞不錯的，「愁雲陣陣」對「胡胡混混」，「轉又轉」對　冷又暖」   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 41，Elaine 又，你睇下，玩到40日，咩　愛情陷阱　愛在深秋　霧之戀　嗰啲我都全部未出。大把貨賣。 1991年，《迷情》隻碟。上次貼過同碟嘅《我做得到》，我話呢隻碟啲歌冇乜邊隻紅。朋友就講起呢首《Elaine》（實情最紅應該係隻《知不知》） 奇怪嘅係，我好似冇印象買過呢隻碟。但我又幾肯定由頭聽到尾。咁可能係問人借？或者租？ Anyway，MV女主角，何婉盈，正係叫Elaine．呢個MV拍得幾靚。 好多嘢都聽我講過，有段時期何婉盈係我公司同事，真的，佢做過一排證券。有一期直頭Race Wong係我同事添，仲有機會同佢一齊唱K，仲有合唱，完全係夢想成真。好似你鍾意劉德華，然後有一日你同劉德華一齊唱K咁。（不過Race Wong唯一嘅條件就係：唔好點佢啲歌，明顯佢估到我想點）至於何婉盈，就完全冇往來的，唔同line．所以冇得扮Joey Tang同佢唱《愛上你是我一生的錯》（我知你仲想講曾航生） 但講返首歌，填詞因葵，但重點當然係作曲嘅周啟生。 你會發現，首歌好有周啟生自己嘅風格，係唔啱倫伯的，呀倫伯唱副歌「Elaine」嗰下嘢相當奇怪。 好多周啟生嘅歌都有呢種特點，例如佢作比李克勤啲歌，又係唔少唔啱佢唱的。但周生當然理得你，「你專業歌手嚟架嘛，只係識唱啲傳統K歌情歌呀？」（呢句對白係我作的） 有期我都相當鍾意周啟生。有幾鍾意？去到放學會由屯門坐船（！）出中環大會堂聽佢音樂會嗰種地步。碟都買過下。 嗰期記得呢個YES雜誌嘅樂評就講，周啟生呢排啲感情生活幾豐富。因為嗰期有呢首Elaine，又有李克勤嘅My Melody（呢首就唔會太突兀），仲有太極嘅Crystal． 然後又話說，近年呀周生當然少不免出嚟批評倫伯嘅政治取向之類（其實個個佢都媽）。咁有網友留言話，喂，你寫好多歌畀佢喎。周生就好簡單答，大佬，我搵食咋。 大家都要搵食嘅。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 40，知心當玩偶 987年嘅作品，都話嗰年就唔攞獎。隻碟叫《再見吧！？浪漫》，似乎係唔多好賣嘅，啲歌唔算太出名，最出名係《Don't Say Goodbye》。改編德永英明，之後貼。 但你心諗，「又係改日本歌悶唔悶？」。實情呢隻碟，倫伯自己作5首歌！ 你憎佢嘅當然可以話「所以咪唔掂！」，都可能係。但All due respect，你唔好同外國或香港啲創作歌手或樂隊比比。但蘋果對蘋果，張國榮梅艷芳有冇作咁多歌？或者後來四大天圶呢？李克勤　容祖兒　陳奕迅呢？ 當然我唔係話識作曲就巴撚閉高人一等，你一樣可以話「吭幾個音之嘛有幾難」（係咯，美斯都係扭幾下波之嘛，有幾難？），純做performer 亦都冇話唔得。不過啦喎，你話倫伯唔識音樂，我就好懷疑你有幾識。 講返歌，冇乜特別。詞倒係填得幾好，「繁鬧市停留　留下雨和愁」嘅頂真（好基本吧），仲有留意啲歌詞都幾有「畫面」，你見個MV就真係拎住把遮的. 當然仲有　歡樂今宵嘅改版《蜘蛛當玩偶》，「今天你竟趕走隻狗搵一隻蜘蛛當玩偶。齊來合奏成為隊友原來為八隻音樂手」不過好似只得幾句，因為係「落選歌曲」，好似冇現場唱的。我懷疑係只係諗到呢句點改。又或者係趕收工。十分有香港人嘅can do ，煮到嚟就食嘅執生精神。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 39，曾經 呢幾日都寫得長，今次短啲。 早一日貼過《痴心的廢墟》，無線《黃金十年》嘅主題曲。呢首係冋一套劇嘅插曲，亦係倫伯自己作曲，向雪懷填詞。當年，就可能比主題曲更加流行，至少見到唔止係TVB榜先有。 但我個人當然係鍾意《痴心的廢墟》多啲   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 38，痴心的廢墟 私心選，我個人相當鍾意。算唔算遺珠？都算算地，因為你見後來演唱會好似好少唱。I mean呢樣嘢好決定首歌會唔會流傳落去。即係廿幾歲嘅無感，但三十幾嗰啲，可能都聽過左倫右李之類。亦同埋，有啲後生歌手，亦因為佢地識呢啲歌會自己再唱。例如《一生中最愛》，就係咁流傳落去。 所以再次強調，首歌有冇流傳落去，睇好多因素，好多時同首歌冇關。加上呢首歌又未去到咩 經典老歌咁會不停有人搵你聽。 講返呢首，係好典型「嗰個年代實會識」。但後生多數唔識嘅歌。因為冇乜演唱會唱過，又冇乜上台。但點解「嗰個年代實會識」？因為TVB 呢首係《黃金十年》主題曲，實情已經唔多記得講乜，但記得有曾華倩。可惜搵唔返當年個TVB開場MV。亦因為咁，呢首歌只係在勁歌金曲有，其他台係冇上榜。 隻碟係《牆上的肖像》，亦係私心選。1987年，唔攞獎嗰年，開始做多咗不同嘗試。但當然有兩首TVB歌，《黃金十年》插曲《曾經》亦係呢隻碟，好似名氣仲大過主題曲。 但呢首歌我幾鍾意，曲詞都好。先講作曲，正係倫伯本人。曲式上，典型嘅AA’BA’。開頭用咗三個「誰」，然後係三個「情」，之後副歌，最後又係三個「情」。當然填詞都係咁樣重覆，但好基本吧。 仲有，希望我冇聽錯。但四拍四嘅歌，副歌用咗三連音「呼呼風—聲~~—呼呼風—催促我」，但「忘情~—呆後退」就唔係三連音，曲式上算係有啲變化。正如開頭「誰~ 留下了~」嗰度亦唔係三連音，細心啲聽會聽到（實情基本要求吧，但好多網友呢啲都分唔到然後學人評） 之後講詞，唔止一次講我並唔太鍾意小美填嘅詞。唔代表佢得唔得，個人喜好。唔敢話專家（講完呢句就會扮專家），但，感覺小美填詞係「舊派」的，相當古典，佢唔會塞啲潮語，甚至好似現代用語都少，「鄭國江之類咁」，但明明又未咁老。你見老過小美嘅 周禮茂，或者 潘源良之類，填詞就「現代」好多。 於是就有啲兩頭唔到岸咁，小美填嘅詞又未係武俠片嗰種，或者區瑞強倫伯式民歌嗰啲喎 長處係啲文字係靚嘅（名校女生喎），真係似文學，但就真係感覺老，你會以為佢老過潘源良好多的。亦都寫過似乎佢講人物心情就好，但冇乜「畫面」，亦冇「情節」，所以你見大家似乎對佢，評價係不及其他幾位 不過呢首我認為真係填得好。「真係有古典美音樂美」 頭先講過，用咗三個「誰」，然後係三個「情」，之後副歌，最後又係三個「情」 然後，「留下了」對「流下了」，第二段係「溶合

  Day 37，左鄰右里。 留意，首歌係叫《左鄰右里》，但開演唱會當然用《左麟右李》。更好笑嘅係，《左麟右李》呢隻碟，係冇《左鄰右里》呢首歌的。呢首歌隻碟叫做《不一樣的譚詠麟》。雷頌德作曲，李克勤填詞 呢首照計唔使點介紹，街知巷聞，三十歲上下嘅（即係我以前教書啲學生）就係因為呢首歌識倫伯。 首歌相當有時代意義，我認為係近N年最成功嘅一個 campaign ，特別係對李克勤。 因為呢首係好近期（廿年都未夠梗係近期）嘅歌，沙士嘅2003年。不厭其煩講多次，唔計溫拿都好，倫伯1979年已經單飛，1987年已經唔攞獎。咁1990年代初已經係四大天王。2003年呢？陳奕迅已經《K歌之王》《明年今日》好撚紅了。 而呢個時間，倫伯居然忽然又有一首爆紅嘅歌，神奇唔神奇？ 但當然，倫伯早已經神神枱級，呢首歌最大得益當然係李克勤。我真心覺得係倫伯想幫佢。 本人其實就真係李克勤迷，買碟都唔少（有廿張吧？）。不過李克勤，你話好彩又好，唔好彩亦得。實情佢冇乜點真係紅過！真係紅，就只係88-91嗰幾年，剛剛倫伯同張國榮開始淡出，而又未四大天王嗰時。但都真係唔係嗰回事。四大天王期，最記得佢劑劑上去男歌手五強陪跑。咁固然無線對佢好，但換著而家啲歌手應該真係唔撚同你玩呢啲馬騮戲。 然後咩1995-2000年嗰期，十分霉，好彩得TVB畀佢主持下勁歌呀，世界盃呀，奧運咁，好多人都知。我諗個問題唔係錢，刁，無線會有幾錢丫。但係keep 住曝光，唔好忘記嗰個年代未有ig Facebook 之類，你冇得自己出嚟宣傳的。而當時亦仲係TVB獨大，咁至少大家知道呢條友未死的。 依維基所講，李克勤大約算係2000年後走出谷底，但我認為真係呢壇《左麟右李》，幫李克勤翻生。 更重要係，之後《左麟右李》呢個組合，搵錢搵到笑，唱遍全世界。仲係因為咁李克勤打到入大陸市場，仲有得上去蒙面歌手呀做人老師呀乜鬼。都話李克勤個仔啲奶粉錢都靠《左麟右李》。當然亦可以種下埋之後倫伯食粉絲嘅……契機 舊文都寫過（ https://ggle.io/4XVd ）， 溫拿嘅友情，十分難得的。當時我都話，似乎音樂造詣同友情，係成反比嘅（BTW，造詣讀醋藝，唔係做紙）。雖然我後來覺得，似乎係心態，而唔係造詣。得罪講句，唔見得Beyond三子有幾醒，偏偏個個當自己好巴閉，反而黃家駒未死時就冇不和。同樣你見到，達明都係不和的，劉以達有佢嘅音樂堅持。

day 36，我做得到 既然講開龍兄虎弟，當然貼埋成龍嘅歌。留意今次唔係貼Youtube，因為呢個daily motion版清啲。 首歌1991年，四大天王年代剛開始。呢首係港台嗰啲乜乜青少年計劃嘅主題曲。作曲係倫伯自己，林振強填詞，冇乜特別。 換著而家，當然可以話 你兩條仆街藍絲雞蟲 憑乜將自己同啲頂級運動員一齊比。之但係，你話倫伯都仲公道。但成龍拍戲真係搵命搏。咁你當然話「冇撚出片酬畀你呀？冇分組畀你呀？」。但same can be said for運動員。而我幾肯定多數運動員唔使搵命搏。你又何來有資格批評成龍？你去跳一次咯。 任你點講都好，我都真係完全可以理解成龍變成淫蟲。你可以諗下，換著係你，有錢有名，但咁樣行過鬼門關，打後你嘅心理會變成點？ 隻碟係《迷情》，似乎冇乜歌好流行。但不幸地呢隻碟我係有買嘅，都話剛上中學，開始有自己錢。對上一隻《神話1991》我都有，正係《一生中最愛嗰隻》 又，合唱歌當然都計，只要係佢原唱嘅都計。改編當然都計，所以遲下會有《明天你是否依然愛我》   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch