Day 37，左鄰右里
Day 37，左鄰右里。
留意，首歌係叫《左鄰右里》，但開演唱會當然用《左麟右李》。更好笑嘅係，《左麟右李》呢隻碟，係冇《左鄰右里》呢首歌的。呢首歌隻碟叫做《不一樣的譚詠麟》。雷頌德作曲，李克勤填詞
呢首照計唔使點介紹，街知巷聞，三十歲上下嘅（即係我以前教書啲學生）就係因為呢首歌識倫伯。
首歌相當有時代意義，我認為係近N年最成功嘅一個 campaign ，特別係對李克勤。
因為呢首係好近期（廿年都未夠梗係近期）嘅歌，沙士嘅2003年。不厭其煩講多次，唔計溫拿都好，倫伯1979年已經單飛，1987年已經唔攞獎。咁1990年代初已經係四大天王。2003年呢？陳奕迅已經《K歌之王》《明年今日》好撚紅了。
而呢個時間，倫伯居然忽然又有一首爆紅嘅歌，神奇唔神奇？
但當然，倫伯早已經神神枱級，呢首歌最大得益當然係李克勤。我真心覺得係倫伯想幫佢。
本人其實就真係李克勤迷，買碟都唔少（有廿張吧？）。不過李克勤，你話好彩又好，唔好彩亦得。實情佢冇乜點真係紅過！真係紅，就只係88-91嗰幾年，剛剛倫伯同張國榮開始淡出，而又未四大天王嗰時。但都真係唔係嗰回事。四大天王期，最記得佢劑劑上去男歌手五強陪跑。咁固然無線對佢好，但換著而家啲歌手應該真係唔撚同你玩呢啲馬騮戲。
然後咩1995-2000年嗰期，十分霉，好彩得TVB畀佢主持下勁歌呀，世界盃呀，奧運咁，好多人都知。我諗個問題唔係錢，刁，無線會有幾錢丫。但係keep 住曝光，唔好忘記嗰個年代未有ig Facebook 之類，你冇得自己出嚟宣傳的。而當時亦仲係TVB獨大，咁至少大家知道呢條友未死的。
依維基所講，李克勤大約算係2000年後走出谷底，但我認為真係呢壇《左麟右李》，幫李克勤翻生。
更重要係，之後《左麟右李》呢個組合，搵錢搵到笑，唱遍全世界。仲係因為咁李克勤打到入大陸市場，仲有得上去蒙面歌手呀做人老師呀乜鬼。都話李克勤個仔啲奶粉錢都靠《左麟右李》。當然亦可以種下埋之後倫伯食粉絲嘅……契機
舊文都寫過（https://ggle.io/4XVd）， 溫拿嘅友情，十分難得的。當時我都話，似乎音樂造詣同友情，係成反比嘅（BTW，造詣讀醋藝，唔係做紙）。雖然我後來覺得，似乎係心態，而唔係造詣。得罪講句，唔見得Beyond三子有幾醒，偏偏個個當自己好巴閉，反而黃家駒未死時就冇不和。同樣你見到，達明都係不和的，劉以達有佢嘅音樂堅持。呢，「草蜢就唔會不和啦」。
溫拿擺明就係大家最緊要好玩嘅一個組合，先唔會同你講咩音樂境界。冇錯，最初同好多樂隊組合一樣，都係最靚仔最有才華嘅（倫伯同阿B）畀人說單飛。但至少咁多年你都冇聽佢地不和，你估容易？
講真，在情在理，大條道理可以飛起阿強的。一早佢已經唔係呢個圈，早早移民，亦都真係從來都冇單飛發展過（阿B算紅過下，OK仔老豆有出過下碟，陳友拍戲），但次次都有預埋佢。你見好多樂隊其實中途會換人的
你估倫伯對住李克勤都係咁，真心幫後輩。佢自己一早上晒岸啦。而倫伯的確十分好人緣，至少在嗰個年代中嘅圈中人都係，你睇佢啲節目，可以請幾多人上去？
所以我甚至懷疑，講靚仔倫伯唔及阿B，講音樂才華可能都未必夠佢。但倫伯勝在識撈，朋友多。（又，我老母同阿姨，成班都係鍾意陳百強，張國榮同阿B的，冇一個鍾意倫伯。最記得係當年阿B搞上章蓉舫，啲阿姨係咁鬧鬧鬧，批死離婚。到真係離婚嗰時，「佢地仲興奮過自己離婚」
留言
張貼留言