Day 41, Elaine
Day 41，Elaine
又，你睇下，玩到40日，咩 愛情陷阱 愛在深秋 霧之戀 嗰啲我都全部未出。大把貨賣。
1991年，《迷情》隻碟。上次貼過同碟嘅《我做得到》，我話呢隻碟啲歌冇乜邊隻紅。朋友就講起呢首《Elaine》（實情最紅應該係隻《知不知》）
奇怪嘅係，我好似冇印象買過呢隻碟。但我又幾肯定由頭聽到尾。咁可能係問人借？或者租？
Anyway，MV女主角，何婉盈，正係叫Elaine．呢個MV拍得幾靚。
好多嘢都聽我講過，有段時期何婉盈係我公司同事，真的，佢做過一排證券。有一期直頭Race Wong係我同事添，仲有機會同佢一齊唱K，仲有合唱，完全係夢想成真。好似你鍾意劉德華，然後有一日你同劉德華一齊唱K咁。（不過Race Wong唯一嘅條件就係：唔好點佢啲歌，明顯佢估到我想點）至於何婉盈，就完全冇往來的，唔同line．所以冇得扮Joey Tang同佢唱《愛上你是我一生的錯》（我知你仲想講曾航生）
但講返首歌，填詞因葵，但重點當然係作曲嘅周啟生。
你會發現，首歌好有周啟生自己嘅風格，係唔啱倫伯的，呀倫伯唱副歌「Elaine」嗰下嘢相當奇怪。
好多周啟生嘅歌都有呢種特點，例如佢作比李克勤啲歌，又係唔少唔啱佢唱的。但周生當然理得你，「你專業歌手嚟架嘛，只係識唱啲傳統K歌情歌呀？」（呢句對白係我作的）
有期我都相當鍾意周啟生。有幾鍾意？去到放學會由屯門坐船（！）出中環大會堂聽佢音樂會嗰種地步。碟都買過下。
嗰期記得呢個YES雜誌嘅樂評就講，周啟生呢排啲感情生活幾豐富。因為嗰期有呢首Elaine，又有李克勤嘅My Melody（呢首就唔會太突兀），仲有太極嘅Crystal．
然後又話說，近年呀周生當然少不免出嚟批評倫伯嘅政治取向之類（其實個個佢都媽）。咁有網友留言話，喂，你寫好多歌畀佢喎。周生就好簡單答，大佬，我搵食咋。
大家都要搵食嘅。
留言
張貼留言