Day 50，也曾相識

Day 50，也曾相識

嚟到第50日，呢首亦係私心選，個人相當鍾意。不過應該都算流行？而我係冇呢隻碟的，不過有個同學成日唱「懷著千般失望　千般失落　一再去淫蕩」

比較後期嘅歌，1990年，《世外桃源》隻碟，即係《理想與和平》。

個MV，陳秀雯。新加坡定馬來西亞？搞乜？定係倫伯嗰期拍緊《驚天12小時》？

又，TVB插曲，套劇叫《午夜太陽》，只係記得個名，完全冇印象睇過，所以唔關TVB事。套劇仲值得一講，但最尾先講，唔想失焦。

我應該好近期先留意到，呢首歌原唱係巫啟賢（陰功，我都買過幾隻佢嘅碟），嗰幾年香港都改好多佢嘅歌，張學友都唔少。

原曲係巫啟賢嘅《你是我的唯一》，佢自己作曲。唔好搞錯王力宏嗰首。呢度貼埋畀你

冇錯，當然又係比較原曲同改編。

咁你講食力，真係唔使討論，當然係巫啟賢勝一籌。但fuck that 香港人好重視實力啦，巫生都係冇乜點紅過。但叫做賣得下碟，錢就搵到啲，攬過下楊采妮，同埋賺咗名氣，而家繼續可以返大陸做老師指點江山。

唔止講食力，仲有睇埋演繹。倫伯係唱得hea的，你可以留意下巫啟賢啲運氣呀，撚聲呀，輕重呀，多變好多。所以除咗食力，當然你可以話係敬唔敬業嘅分別，但我覺得亦係上咗神枱，同未上位嘅分別。洛奇都榮華富貴啦，仲邊有窮黑人Mr T嗰啲飢餓感？

留意下巫啟賢唱副歌，「這樣的結局」「的埋怨和悔意」（即係倫伯唱「一再去流浪」「匆匆再次回望」），係撚得好好聽的。特別係最後「結」「悔」嗰兩下音，你可以拍埋倫伯「流」「回」度聽下

不過，不幸地，二揀一我都係揀倫伯。除咗先入為主，仲有兩個原因

咁你估到了，既然歌者同埋演繹都原曲好啲，咁當然係剩返嘅地方出問題。就係編曲同填詞。
原曲嘅編曲，係比較簡單嘅。但又似乎鋼琴唔多夠。

但當然，最大問題都係填詞。

一路嘅偏見，都係唔太鍾意啲友一個字連幾個音。咁你見呢首亦係。當然亦可能係普通話同廣東話分別

「當年從頭識過」，原曲係「選擇了逃～避」。然後副歌更明顯，「曾經努力過」原曲係「我的最～初」，「曾經相識過」原曲係「我的最～終」，「所得幾多」係「唯～～一」

仲有，亦係偏見，但我唔鍾意啲填詞人太懶。副歌要洗腦上口我明，但其他位最好唔好重覆。

呢首歌，十分典型嘅「開首，轉折，副歌」

好啦，原曲，開頭已經用兩次「很想給你寫封信」，算，忍你，當你想強調。同樣地，副歌最尾係「雖然你是我的最初　雖然你是我的最終　雖然你是我的唯一」，OK的。甚至用兩次「或許你不相信」，都可以

但我就真係不能接受佢轉折，重覆兩次「愛與不愛都需要勇氣　於是我們都選擇了逃避」，有必要嗎？

相比下，潘偉源嘅詞比較好。「可會恨我　那一次做錯」對「想抱著你　去解釋經過」。副歌係「千般失望　千般失落」「一分激動　一分希望」，應該睇到分別吧。

正如我自己認為「畢竟算是曾經努力過　分手也是曾經相識過」都好過「雖然你是我的最初　雖然你是我的最終」，但呢個可以各有千秋。

講返《午夜太陽》，冇印象。但卡士好勁，黃秋生吳鎮宇。但嗰個年代仲係TVB如日方中，拍套《原振俠》，黎明李嘉欣王菲朱茵呀。

但講返《午夜太陽》，《也曾相識》係插曲。主題曲，正係無人不識嘅《變色感情》，徐小鳳。咩話？你唔識？

逝去感情如何留得住～半點痴情遺留殊不易～.更多悽悽慘­慘的遭遇～我不知道

周星馳喎！《賭俠》喎。我都費事貼片

而係咪想像唔到，《變色感情》同《也曾相識》，仲有《賭俠》，係同一年嘅事？

倫伯（當年）真係好撚紅