倫伯（當年）真係好撚紅

  Day 27，我愛世界。玩到2022年，應下節。 之前題過，譚詠麟好少唱卡通片歌或兒歌，朋友提返係同唱片公司有關。咁呢首係極少數嘅兒歌，雖然最初係電影《恭喜發財》嘅插曲 歌冇乜特別，郭小霖作曲，黃百鳴填詞。我懷疑佢地應該用咗15分鐘定30分鐘就搞掂隻歌。況且郭小霖雖然係鬼才，但真係有抄歌嘅前科，隻《迷惘》明顯係照抄人地，一個音唔改，但當然神不知鬼不覺啦。（自己搵個故事吧）。反而黃百鳴，當年填啲詞，又唔算特別求其。 之前都講過黃百鳴有一期填好多倫伯嘅詞，亦因為倫伯同新藝城（曾志偉嘛）好frd．好多亦都做埋電影主題曲，慳水慳力。 有趣嘅係，今日先發現，呢套戲原來係同《聖誕快樂》幾相似的。（ https://bityl.co/AImE ）　。冇錯，我居然好似係冇完整咁睇過《恭喜發財》 兩套都係新藝城，咁啲幕後一樣唔奇。但奇在啲人物設定，甚至道具都幾重覆（但諗真啲又好正常）。即係拍完聖誕，咪拍埋賀年，甚至係同一時間拍。 不過好歹都唔係真係好一樣，演員都轉晒，《聖誕快樂》歌星就張國榮陳百強，《恭喜發財》就倫伯林子祥。正如《聖誕快樂》諧星兼自己友就麥嘉，《恭喜發財》就石天。《聖誕快樂》王女就李麗珍，《恭喜發財》就柏安妮。 不能不講，柏女妮個女都差不多廿歲。而呢個MV入面啲小朋友，而家都四張嘢，仔都生埋。石天都死埋。但倫伯仲係食緊廿幾歲嘅女fans！ 年年廿五歲，你估講笑？當然羊胎素好重要。邊個話錢買唔到青春買唔到快樂？ 你估到了，到農曆年，我就會貼《恭喜發財》   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 26，計時炸彈 年尾，原本想貼首《世界停頓》應下景，原來貼過（所以要有個Excel） 倫伯有唔少唔太紅嘅快歌我都好鍾意，包括之前嘅《愛你太深》《世界停頓》，同埋未貼嘅《千年埋藏》 作曲入江純，一直都係幫倫伯作曲，唔係改編歌。填詞向雪懷，冇乜特別，但我幾鍾意佢填嗰句「舊夢舊愛 無從移動」個「移」，歌應該只係一個音（耳），但個「移」字變咗帶兩個音（移耳），十分有趣。 留意係冇MV的，因為呢首唔係主打歌，好似plug左五六隻歌都未到呢隻，驚驚。 呢隻碟《牆上的肖像》，陣間再講多啲，1987年頭，只係倫伯第十二隻碟，但已經上晒神枱。有證據的，因為1986 年佢已經唱《無言感激》，唔係神枱級冇可能唱。 而1987年尾佢已經宣佈唔再拎獎。 而當年倫伯重點已經唔放香港，拍完《龍兄虎弟》，開世界循迴演唱會，去東京音樂節，上埋武道館，去埋漢城（1988漢城奧運前），同谷川新司趙容弼 中（？）日韓三個拍住上。「應該好多嘢玩」。不過，倫伯上紅白，都要去到1989年 呢隻碟當然老豆有買，我係日夜聽咗好多次的，所以數100首倫伯有幾難？ 然後諗真啲，照計我數張學友，李克勤，容祖兒都數到100首，但真係唔同，因為呢幾件啲碟我自己買，加上再大個啲，真正日聽夜聽，加上青春期，更加鍾意對號入座，而我又真係叫歌迷，仲會去演唱會呀，上網重溫呀咁，真係唔同。 所以結論都係，倫伯真係好撚紅。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 25，愛你太深 呢隻你見我成日貼，私心選。都講過好鍾意佢唱低音「才投向別人」嗰下，相當準（當然現場版就未必完全準） 亦係早期嘅歌，「愛情陷阱」隻碟。 呢首歌仲要係有英文版的，相當騎呢。實情因為倫伯在日本出過碟，有一隻係全英文的，所以甚麼《暴風女神》都有英文版。 當時倫伯在日本都相當紅，因為套《龍兄虎弟》拍成龍，而成龍當然係紅到一個點，套戲甚至係在日本上咗先到香港。 呢個MV係《歌者戀歌》套戲，絶對係自傳兼飛機，音樂特輯咁滯，90分鐘嘅戲塞咗 廿首歌，如果我冇記錯好似好多都係全首！ 當然，當年啲歌冇咁長嘅，好多係3分鐘多啲，but still….． 彩蛋係當年可以在紅館食煙，嗰個係薛芷倫， 網上你可以搵到成套嚟睇，當年只收500萬票房，相當失敗。但當然左手交右手，全部剪返啲歌出嚟之嘛。倫伯一個由頭演到尾，加埋張國強（唔係張國榮），斷估都只係友情客串意思意思自己友。 咁另外條女我幾鍾意的，林河廷，奇人。原來中韓混血（我鍾意！），瑞士讀書（怕且係有錢女？），暑假返香港就報呢個 「健美小姐」，拎亞軍。 冠軍係…..馬清儀（死埋），季軍劉美娟，張崇德老婆。有冇覺得唔妥？同年代的？原來馬清儀老劉美娟15年，但同場「健美小姐」。第四何美婷（城市故事！） 講返呢個林河廷，當時原來玩到好串，開記者招待會話 黑幕造馬，冇可能輸比馬清儀，仲話放棄亞軍返瑞士讀書云云。但一年後又出現在呢套戲，咁斷估片酬都唔貴。 拍完呢套戲又消失咗！ 但都係近排再睇先知，原來後來改名去咗日本出咗碟，都賣得下，但當然最紅都係紅唔起。 背後呢，應該有好多故事嘅。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 24，網路情迷 Er…….都係有點膠嘅歌。個編曲特登營造啲 迷幻cyber氣氛，但都係唔多掂。編曲嘅係「亞洲鼓王」唐龍 Don Ashley。搵食嘛。之前仲有李美鳳嘅 《熱愛Can’t let you go》（實情我幾鍾意隻歌） 但唔好忘記，係1996年嘅歌，好多人都未上網。我都未。所以，係咁老土架啦，MV情節都係咁。但重點當然係陳妙瑛。可惜冇再高清嘅版。 當年最記得都係嗰句「逃離電腦相見麼」   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  ［倫伯真係好撚紅］ Day 23，活得瀟灑。亦係特登揀呢個MV，好似唔係原裝，但叫做有返原本TVB劇啲片段。 合唱歌算唔算？應該都算吧。之前都貼過《偏愛》。況且，你諗真啲，演唱會唔計，倫伯其實唔多合唱歌，夾埋我都未必數到十首。 又諗下都可以解釋到，因為合唱歌都同 90年代初卡拉OK文化有啲關係，咁已經係倫伯嘅中後期。甚至你可以話，佢當時已經係上晒神枱 唔攞獎嘅巨星，就唔使點出K歌合唱（雖然張學友都出咗唔少） Anyway，呢首冷唔冷門？視乎你邊個年代。咁如果係我年代，又有睇TVB嘅（正路地都有睇），好可能會識。 TVB劇《笑傲江湖》嘅主題曲，呂頌賢做令狐沖，幾好睇的。我甚至覺得同許冠傑有得比。但你諗真啲，好少人在銀幕上演過令狐沖。For some reason，《笑傲江湖》唔係成日改編。除咗 許冠傑同李連杰拍戲演過，TVB呂頌賢之前，係周潤發演令狐沖 歌嘛，幾好的。填詞作曲都係蔡國權。填詞十分符合《笑傲江湖》江湖腥風血雨政治黑暗名利權色人性醜惡你班友虛撚偽我討厭政治嘅主題。當然倫伯點睇「名利一息間也許消逝 權力不可以任你主宰」就後話了。 另外，留意下，首歌雖然係合唱歌，但同好多K歌或 羅文甄妮之類嘅主題曲唔同，首歌差不多由頭到尾都係佢兩個一齊唱的，倫伯好似由頭唱到尾，陳慧嫻都只係得兩句冇唱。呢個編排當年唔係咁常見，亦都唔知邊個決定將呢首歌變成合唱歌。作曲同填詞上，並冇好明顯咁舖排到一男一女合唱。 留意蔡國權啲作曲真係幾有「個人風格」，中式小調。例如佢自己嘅《寒傲似冰》《不裝飾你的夢》，徐小鳳嘅《順流逆流》，關淑怡嘅《真假情話》之類。係少數聽首歌就有機會估到係佢作嘅人（亦因為嗰種風格到90年後中已經式微） 當然唔係全部都係中式小調，佢作好多好多歌，自己有，其他人更多。可惜就真係外表問題，冇紅過。但照計當年作曲都唔少錢嘅。後來撞車就後話。 編曲嘛，都應記一功，劉諾生，CityBeat個鬼佬。當年好多創作的，近年成日上TVB。

Day 22，再等幾天 呢首嘛，夠晒經典。因為填詞，演唱，個MV，全部都係災難級。 原曲係德國樂隊Scorpions嘅 Wind of Change，非常之咁出名，曲詞俱佳，樂隊嘅代表作。正值蘇東波，蘇聯解體之前，Klaus Meine去咗蘇聯，聞到變天嘅味道。一句Let your balalaika sing，What my guitar wants to say，話畀你知咩叫 異曲同工。 而我係去到極之遲先知倫伯改編過呢首歌。遲到幾時？遲到我識原曲好多年之後，即係講緊2000年後我先知倫伯1992年改編過呢首歌。 同原曲，真係冇得比了。原唱實在太超班，而林敏聰填嘅詞亦感覺十分求其，仲有非常之多一個字填幾個音嘅情況。 加埋倫伯學/抄 原創樂隊嘅呢個電單車metal造型，實在都係好惹笑 不過，正所謂雨雲都有銀邊，呢個MV嘅重點，當然係女主角黎姿！     我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 21，捕風的漢子 好似貼親都係早期嘅歌，同埋比較流行嘅。冇計，都係想搵啲大家識嘅。 好記得呢個原版MV又噴火又放火咁，唔知做乜。詞嘛，林振強，都不錯，「像是立了心一生追悼，某個已於風中逝去的夢兒，茫然流浪去他將此數字，畫於街中廢紙」 又，首歌，我總係覺得「到喉唔到肺」咁。上面「像是立了心一生追悼」呢段當唔當係副歌？定當過門？如果唔當嘅，咁副歌就只係剩返「Marianne ~~」嗰段了 原曲日文，早兩日先聽，聽講殿堂級樂隊。原曲嘅副歌就都係英文，廣東話版完整保留晒。 當然我唔係專業，所以只能就咁講「覺得」。咁但你見我都唔係一定話原唱好啲或倫伯好啲。呢首嘛，詞冇得比，我又唔識日文（咁只睇意譯冇可能分到人地填得好唔好咯）。但唱，就真係原唱好啲了。不過編曲，我都係鍾意倫伯版。雖然原曲我都搵到有好多唔同編曲版本，但計元祖版，都係倫伯版編曲好。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 20，再見亦是淚 實情每日咁出，都係一種負擔，但有人讚就繼續。將來可能寫短啲。 呢首亦係相當多人識嘅作品，但留意係相當後期的了，1994年。你諗下倫伯1980年已經單飛，都唔好記埋溫拿年代 呢首亦係改編歌，原版都算流行，國語歌，邰正宵嘅 《找一個字代替》，但呢首歌唔係佢作。 呢首就.....都係倫伯版好，演唱同埋填詞都係   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 19，相識非偶然 睇個封面都知歷史文物（當然倫伯都係歷史文物，我都係，相對嘅啫） 不過呢首真係文物中嘅文物， 40年了，而倫伯先70歲 呢首當然係佢最早期嘅作品，1980年，第二隻廣東話碟。聽啲風曲都聽到，十分「許冠傑」。嗰時仲係改編英文歌為主，本土創作仲係剛萌芽。呢首就係本土創作，歷風（早幾日我先知係馮枝）。留意當時倫伯仲未改編日本歌，應該話成個香港樂壇都未開始，亦都未係後來嗰啲情歌。仲係清新風。對，呢首都情歌，但風格填詞都不同。 但又諗下，呢首歌時，倫伯都30歲啦喎！咁遲先第二隻碟？熟歷史就知好合理，之前仲有 Looser 溫拿之類，又去咗新加坡又去埋台灣又乜。 呢首嘛，還不錯的，「唔知點解當時我音樂堂唱過」。 又，首歌好似好易唱，但啲低音位都係蝦人嘅。你搵人唱下K，就發現好多人唱到「願永遠 兩依戀」嘅 「兩依戀」已經啲音唔準。仲有「危難處」「緣份有了」嗰啲位 亦因為咁，有個倫伯同陳慧嫻嘅合唱版，就會轉咗key去就返女仔，始終男女有別，你見陳慧嫻唱啲低音都有些少吃力，亦變咗倫伯就再高音啲。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day18，夏日寒風。 「龍虎豹好睇～～～好睇～～～但係又好X貴～～～～」（另有一個版本係「藏春閣」），我懷疑，30-50歲嘅香港男性，90%以上都識。 冇法，呢首歌真係改編版仲紅過原版，始料不及。 當年睇呢，最記得就係呢個寫住「夏日寒風 譚詠麟」嘅車！ 呢隻碟係「愛的根源」，聽聞賣咗200萬張！ 唔係精選碟，入面8首歌上榜：《愛的根源》、《夏日寒風》《愛在深秋》《誰可改變》《捕風的漢子》《都市戀曲》《我愛雀斑 》同《酒紅色的心》，即係，等於張學友隻《真情流露》咁咯 更大鑊嘅係，呢8首歌我全部都識唱！唔使睇歌詞都唱到大半首嗰種。我諗，我真係粉絲。 留意入面唱「擠迫的沙灘裡，金啡色的肌膚裡，閃礫暑天的汗水」。好多人提過，唱錯，係閃爍，問題係「閃爍」根本唔啱音，即係填詞人填錯，而根本冇「閃礫」呢個詞。填詞嘅係林振強。 但更奇怪嘅係，至少有四首我識嘅歌，都填咗「閃礫」。呢首以外，仲有同係倫伯嘅《霧之戀》（或睡或現，閃礫不停）。仲有張學友嘅《沉默的眼睛》（望晚星，閃礫妳的眼睛），同埋容祖兒嘅《我的驕傲》（為我閃礫像最初） 咁你話，一條友錯四次，錯足咁多年，唔奇。但奇在呢四首歌係四個唔同人填詞的！集體撞邪事件！定當時字典出錯？林敏聰，林振強，陳少琪，黃偉文，集體撞邪。 填啱嘅？有，夢劇院！《天生一對》。「愛看星空那閃爍美」。果然名校女生讀大學唔同啲。 仲有個版本係劉舜文（係！嗰個劉舜文！）同埋白只（係！嗰個白只）同埋朱康（係！嗰個朱康！）唱嘅「盧斯奧好睇」 「這書仔咁威，要收喺櫃。間中睇你睇，只怕你一不小心～～～射～穿～個～櫃」「圖畫美麗，顏色美麗～～～立～體～咁～滯」。留意呢個最後嘅四連音做得好好，我唱嗰時係十分咬牙切齒的   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day17，愛的替身 原本想爛尾，因為都真係花我唔少時間。但見有人like又繼續。我諗下，既然都寫咗，不如求其整個blog save起佢 呢首嘛，《霧之戀》隻碟。留意呢隻碟好勁下，有人以為係精選碟，除咗《霧之戀》，仲有《幻影》，《傲骨》，《愛的替身》《亮了紅燈》《愛是這樣甜》《午夜麗人》等等 原曲冇錯係改編日文歌，但其實成隻碟得兩隻係改編。作曲嘅係同《霧之戀》同一人嘅 鈴木キサブロー（喜三郎？）。當時隻碟都係咁印，冇漢字。嗰時個插曲係，好期待到底頒獎時會點講？我記得係Dodo姐，結果都只係講「作曲鈴木，填詞向雪懷」咁。仲有梅艷方嘅《夢伴》都係此人作曲。 「問現在我如何能不心痛 你的衣襟　掛起他的心口針」，幾有畫面。不過其他部份填詞，就只係普普通通 當然呢首歌係有惡搞版，林敏聰同曾志偉嘅《菜的替身》（ https://ytube.io/3OXC ）。將堆前奏變咗做「死八婆 死八婆」絶對係神來之筆。仲有原曲嘅 「其實你待我算不算愛」，改咗做 「其實你共我算不算做愛」 ，曾志偉仲要特登唱慢半拍，慌死你唔明邊度斷句。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 16，小風波 呢首當然係極早期嘅作品，分得到的。相當清新之作，1981年，單飛後嘅第三隻廣東話碟（但居然出咗兩隻國語）。 呢隻碟叫《忘不了你》，而《忘不了你》本身當然亦係五輪真弓。因為呢隻碟成功，所以下一隻就有《雨絲情愁》。甚至你可以話係呢隻碟後就開始 全香港改編日本歌。 嗰期仲係好有溫拿影子，或者許冠傑嗰種油脂仔風味，唱英文歌。唔明係乜？咁你可以比較下，後來《幻影》《霧之戀》之類完全唔同，或者《暴風女神》《愛情陷阱》之類都完全唔同。 原曲應該人人都識，Air Supply，All out of love，咁就當然係原曲好啲，條澳洲佬主音不得了。但你嗰時邊有YouTube？況且，新一代就識英文啫，老嘢點識？ 又，聽聞有個”Air Supply”測試，即係啲忠實Band友音樂能，嘅底線就去到呢度。你聽”Air Supply”嘅，就係叛徒，主流撚了。同樣地，聽聞仲有”Bon Jovi測試”，或者”ColdPlay”測試。 「不過我覺得Air Supply好好聽」，咁我連Twins都聽，當然係主流撚。「雖然我好似只係識兩首歌」，仲有邊首？當然係Making love out of nothing at all（其實中文點譯？「冇嘢搵嘢嚟屌？」） 但夠了，個個歌手我都識幾首歌，「足夠我同唔同年紀唔同背景唔同國藉嘅女溝通」。講真的，唔係以為因為我靚仔下話？但我同不同嘅女都可以有話題，因為樣樣都吹到少少。 以前識條女跳Flamenco（唔靚的，唔使問），咁我會同佢講到吉卜賽人，回教徒，命運與死亡等等，「好夠架啦」，「因為有啲毒撚以為係卡路斯辛坦拿」。正如嗰時睇麥兜菠蘿油王子，我可以同條女講《我的心裡沒有他》梗係靜婷（！）版先係王道，而唔係at17（sorry）．我甚至講到原曲係西班牙歌（OK，巴拿馬，是但啦）。又正如舊年睇電影節，人地就睇余香凝個bra，但我就留意戲入面唱《深夜港灣》係甄楚倩版唔係關淑怡（當然，跟返個時代），兩個版唔止編曲唔同，詞都唔同。甚至可以講返 山口百惠嘅《秋櫻》—當然呢啲好多廢老都知，但廢老又唔會識同你講陳奕迅嘛。 咁我當然唔係咩「識音樂」，你可以話你識得多過我，絶對唔奇。但咪話好多人都在某啲領域識得多過我，但我係樣樣識啲。而非官方統計，港男在某啲領域識得多嘅，唔少都變咗煩膠，例如巴膠鐵膠德甲膠政治膠高達膠，女人唔鍾意的 再講，早年譚詠麟係改

  Day 15，卡拉永遠OK 首歌係倫伯作曲的，但不重要。呢首嘛，真係一個時代的記憶。後生仔可以睇下，當年唱K係點的。而當然呢首歌係食住當年唱K熱潮。 至於唱K呢樣嘢，幾時傳入香港？都係1980年代尾，記得嗰時同老豆（！）老母同埋阿姨一齊。十分老幼咸宜。嗰時真係十九區周圍都有，亦未係大規模連鎖式。記得嗰時老豆唱就係而家B仔涼粉舊店嗰頭，當時仲係好臭好舊好靜，已經有B仔涼粉，但好摺的。 至於後來我中學唱華都K，兩蚊任摸嘅都市傳說，由最初要拎隻LD入房（所以放學趕住去，否則好嘢畀人拎咗你就只能唱梁雁翎）拎住本極厚嘅嘢在門口入代碼（420024咁）揀歌，cut cut cut cut乜撚嘢之類嘅故事，寫過多次，不再講 呀仲有，當年呢，卡拉OK襲港，啲「專家」（即係而家嘅KOL）係唔睇好的。覺得中國人（唔好分咁細）性格內向喎（架仔又會好外向啦？），怕醜喎，唔會好意思在咁多人面前唱歌喎—證明都係網友最撚醒。 仲有，for some unknown reason，唔知點解好記得，隔離台（亞視）拎咗嚟改編做世界盃歌。最記得嗰句係「美國～～～捷克～～鬥志～～OK」。而嗰年美國同捷克就真係同組嘅。嚴格嚟講係捷克斯洛伐克（當年未拆），但簡稱就捷克，十分亂嚟。印度尼西亞又唔見你簡稱印度？（但伊巴謙莫域當然係伊巴，唔係伊巴謙） 填詞嘅係潘源良，冇錯係嗰個潘源良（當年足版有人以為講波嘅同填詞嘅係兩個人）。你睇，馬勒當拿都死撚埋，李麗珍都要演道姑，但潘源良依然食女無數。 不過，長谷部誠都仲踢緊德甲，分分鐘下年踢歐聯。講真的   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 14．理想與和平 暫時我貼親都係啲相當紅嘅歌，呢首都係。係嗰個年紀嘅冇可能唔識，當然你話後生嘅另計。好似後來演唱會比較少唱。因為首歌有個時代背景，1990年嘅世界盃主題曲嘛。 咁所以，冇乜好講的，原曲當然好。又，我都到相當大個先知原曲唔係To be number one，英文版都只係改編，但諗真啲好合理，意大利主辦嘛，意大佬點會背用晒英文歌做世界盃主題曲？仲要係當年（而家可能好啲，全球化嘛，況且意大利迷失幾十年） 而又可以畀人屌，但我覺得倫伯版好過英文版。但原版意大利文就最好。 又，填詞當然都好，林振強。 又，世界盃係有「官方歌曲」的，不過好多人都WFC．呢首應該係史上最流行（？）嘅世界盃官方歌曲。另一首當然係Ricky Martin（有西班牙文有英文）。打後嗰啲，好似都冇人理。 呢個現象在「奧運歌曲」更加見到，以前係有「奧運歌」的（例如1988 漢城奧運嘅Hand in Hand，留意係韓國人唱英文歌，而家睬撚你都有味），而家亦係WFC 背後亦都係嗰啲原因，雖然係全球化，但亦都碎片化。 當然亦可能只係我年紀大咗，總覺得後生時，好似人人講世界盃。甚至我初出嚟做嘢都係，返工都會講，而家就得返啲網上嘅狂粉了。 又，亦係特登揀呢個山寨MV。反正我搵唔到官方MV（英文意大利文就有），咁呢個，可以畀大家（其實係我）J下 1990年西德捧盃 呀，仲有個版本，係達明一派同 Beyond 同台唱呢首歌。＂果然香港沒有樂壇 只有娛樂圈＂   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 13．午夜皇后。話咁快我就追返！ 嘩，呢首我都好鍾意（實情倫伯好多歌我都鍾意，冇計，老豆由細洗腦）。但我唔知流唔流行，但睇資料似乎有派台但冇上過咩前列。 呢首係《擁抱》隻碟嘅第一首歌，所以當然係聽到熟晒。實情成隻碟都識。之前貼過《千金一刻》，而呢隻碟更流行嘅歌我都未貼 要講嘅係，我到今日先知呢首歌係改編英文歌。The Yardbirds - "Heart Full Of Soul"。我就唔識The Yardbirds（當然係我問題）。 更有趣嘅係，咁多年都冇覺得呢首歌會係改編歌，雖然作曲人係個鬼佬名。因為我覺得首歌個格十分「港」。而請唔好問當年我點分，但總之就覺得唔係改編歌。 好啦，冒住畀品味男屌我嘅危險我都要講：我覺得倫伯呢個版本，好過原創。主要係編曲方面。特別係啲Bass（?）間奏。你可以搵冇MV嘅版本，啲聲會再靚啲。 不過當然，原曲係1965年，去到倫伯唱都已經1988年，編曲風格當然唔同 但同時我亦要講個MV，條女係……李美鳳？至於隊Band就真係唔知 編曲嘅係入江純，就真係日本人，當年倫伯好多歌都係佢。咁所以有啲小朋友話「都係靠幕後勁」。但，就請循其本，點解咁多勁人，黃家駒劉以達 芹澤廣明 入江純之類，都要幫佢？咁固然係因為公司要（我諗起Mirror！聽日記得投票）。 咁但，首先你可以鳩寫hea寫（我又諗起Mirror！網友話理諒Now台要續牌，咁我肯定夏寶龍指明要Mirror上陣否則會雞姦李澤楷）。 另外，林振強生前都講過，梗係有私心啦，最好嘅詞梗係寫畀最紅嗰嗰啲啦（佢冇講倫伯，而呢首亦唔係佢填）。你將心比己都知，「即係我好嘢梗係在Patreon寫」。 又，句歌詞「她內心未接受 為什愛總要像罐頭 若被揭開以後 沒辦法可永久」實在填得好，不過細個我一路以為「追討滿心中的仇 她似傲慢皇后」係「追討滿心中的愁」，雖然明顯我個版本唔通   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 12，火美人。 實情呢首歌唔係我特別鍾意，但有個耆英嘅同事次次都會唱（老過我十年啦）。亦好似次次都係揀呢個演唱會版，所以向佢致敬（未死的） 都係嗰句，首歌我並不特別鍾意，無論當年，定後來聽佢唱咗N次，都唔覺得好 不過呢首歌，後來仲有第二生命。就係當年《逆權司機》，一開頭個的士司機（宋康昊），就聽緊呢首歌，而且一路唱。不過係韓文。老嘢聽到就明，埃汾太好奇怪我居然識啲80年代嘅韓國歌。 咁當然，唔係譚詠麟紅到韓國 — 譚詠麟都真係紅到韓國，但呢首歌本身就係韓文，係譚詠麟改編。趙容弼嘛 細細個就識呢個名，因為個弼字（幸好老豆會車我出旺角食烤雞大王，所以識得個弼字唔係粥，賀若弼唔係賀若粥）。咁，大中華膠，梗係當中國人啦。盧東尼我都當中國人啦（冇錯，正係佢編曲） 但，當年，真係邊有改編韓文歌？韓仔耕緊田咋，邊有K Pop？當然都有流行音樂，但韓國以外冇人識。趙容弼係極極極少數 在日本香港有人識嘅韓國歌手。 歡迎熟韓國嘅反駁。但就我理解，趙容弼在韓國，就真係神級，等於香港嘅許冠傑（當然新一代無感） 因為，佢仲要係去過北韓開演唱會的！！！ 而趙容弼亦係第一個去紅白嘅韓國歌手，早過倫伯幾年，但因為佢連去四年，所以有同倫伯同屆演出。同一個年代的   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 11， 吻別 我知漏咗兩日，事忙兼冇心情（做激光嘛）。但放心，既然有人追，我總會找埋條數。呢幾日補返。 因為忙，唔揀啲太冷門嘅，太冷門嘅可能要搵下資料。但呢首《吻別》，在張學友嗰首之前（兩首完全唔同，只係同名），都算係幾出名。亦係當我甚至而我我相當鍾意嘅情歌。 最重要係，覺得啲詞填得好，「飛女都飛得咁有型」， 呢首歌係林敏怡作曲，但我特別想講作詞嗰個。文井一，不知何許人。填嘅詞又唔算好多，但個名易記。留意好似成日都填林敏怡，所以有人話係佢本人，或者佢男朋友之類。另一首亦係 林敏怡作曲 文井一填詞嘅，係張學友/張國榮嘅 《飛機師的風衣》 另外，諗咗好耐揀唔揀呢個版本。因為開頭冇咗半秒（都話我是好撚認真的！），但權衡之下，都係照用，你可以搵返完整版聽返嗰半秒。 仲有，留意下倫伯唱第二次嗰時嘅歌詞，歌詞打「總抹掉不去」，但佢係唱「總抹~~不去」。當年我就咁聽，完全聽唔到唱乜，以為係「總悶悶不去」。後來幾次演唱會，都聽佢係唱「總抹~~不去」。而「總抹掉不去」，音就啱，但文理好似唔多通順。 仲有，我睇過最好嘅版本，係演唱會。唔肯定係電視，錄影帶，唱K定現場，但好可能係現場，老豆有帶過我睇。最記得成個台變晒粉紅粉藍色心心咁。不過搵唔返個版本。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 10，這世界已瘋癲。呢首應該少人識。電影「俠盜高飛」嘅主題曲。咁係泰迪羅賓做配樂嘅，呢首歌亦係佢作。但重點係填詞嗰個，係個叫 梁望峯嘅小朋友   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 9，偏愛。記住飛去後半睇。日本妹呀喂。日本妹呀喂！Show some respect！早見優呀！ 我諗咗好耐，好唔好貼呢個版本。首先，呢個版本個MV直頭日本（應該東京？新宿同澀谷？）取景，值得你睇下當年東京咩樣。 咁仲有，當然係要貼合唱版。有獨唱版的，好悶。但，呢個版本你見之前仲有李美鳳甚麼，我原本唔想大家分心。咁當然有只係後半截嘅版，但冇咁清，啲聲冇咁靚。 噢，仲有個容祖兒合唱版的，我係忠粉都建議你唔好去聽 你睇我對版本幾咁執著，所以幫幫手，唔好討論頭半。 十分奇怪地，呢首歌我去到中學會考時先識的。因為青年中心有條友不停聽（識的）。 但老嘢應該知，呢首歌係套戲嘅主題曲，《用愛捉伊人》。好奇怪，我有睇套戲，但對首歌冇印象。但當然套戲只係在屋企同老豆睇錄影帶。 講返首歌。作曲係……倫伯自己。好出奇？倫伯都有作啲歌。當然酸民會覺得佢掛名。之但係，都話倫伯紅褲子Band仔出身，識作首K歌，都唔係咁出奇下話？ 冇錯，呢首歌就係K得很。一定係兩個人合唱先好聽。 而呢首歌特別或騎呢之處，你都知，日本妹合唱。但日本妹唱英文，倫伯主要唱廣東話（除咗最尾合唱）。 咁大家都睇到，中英文分別唱嘅歌詞，意思係相近嘅。當然一齊作的話不難就。 游出孤單　游出思憶 No worriness no silly thoughts 紅色恍惚　藍色憂鬱 Shivering red soft moody blues 無心的真　無心的愛 unselfish heart unending love 後來接住唱就更加係 You enlighten me 我燃亮你 And you left behind 我亦留下了 又，「思考題」，你估倫伯有冇食過早見優？我估係有的。「你不如估下曾志偉 王晶 泰迪羅賓 有冇」   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 8，酒紅色的心。相信不用介紹啦下話 冇錯，亦係改編日文歌。不過個問題係：根本嗰時全亞洲都係改編 安全地帶嘅歌！全亞洲I mean 香港同小小台灣。大陸仲窮到未著褲，韓仔耕緊田，其他地方更加狗也不屌。你可以去睇下，當時有幾多歌手改編 安全地帶嘅歌。 癲到係，唔止一首歌，係幾條友翻唱。即係，＂後藤夕輝＂首歌有陳慧妹 梅艷芳 同 Blue Jeans版咁。 而呢首，當然亦唔止倫伯一個唱，仲有蔡楓華，同一年改編，首歌叫＂月蝕＂。 唔計樣呀唱功等等，編曲係冇乜分別嘅（兩個改煸都同原版差不多），但填詞，就我覺得倫伯版勝一籌。當然可能先入為主，歡迎反對。 不過我最想講嘅係：仆街，兩個版本都係向雪懷填的！一首歌要填兩個版，到底係錢好易搵，定好難搵？我傾向係難。我估佢寧願填首新嘅。 咁但又，如果同安全地帶（玉置浩二）比，就點都係原版好了。但嗰時你邊撚有得一年去幾次東京？ 又，最經典嘅一個版本，係玉置浩二同倫伯合唱。唱乜？梗係唱廣東話！同場加映 倫伯的架妹歌迷，多到食唔晒。（ https://ytube.io/3OFT ） 呢個節目好撚痴線，除咗有玉置浩二，仲有德永英明 谷村新司同埋趙容弼。最後仲有中日韓合唱＂愛在深秋＂。而我當然到嗰刻先知趙容弼係韓仔（喂，姓趙嘅就當香港人架啦，都話嗰時韓仔耕緊田） 應該都有人知，早幾年＂逆權司機＂入面，的士司機一開頭哼嘅歌，就係趙容弼嘅歌，而香港觀眾都會識，亦因為係倫伯改編嘅＂火美人＂ 實情，如果我再識多啲樂壇嘅嘢，又識多啲音樂，應該可以寫好多文。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 7，世界停頓 呢首，應該係暫時最唔出名嘅一首？但當然當年嘅都會識。隻碟係《第一滴淚》，呢首係第一首歌，所以易記得。呢隻碟開始就有埋 劉以達作曲，但呢首唔係佢作。作曲嘅係葉肇達，資料冇乜，但好似係做電影配樂的。有幫譚詠麟寫過兩三隻歌咁 另外我想提下個MV，就係十分典型嘅80年代MV。亦即係陳奕迅在《重口味》中致敬嗰種。《重口味》固然致敬《愛情陷阱》，但我個人覺得呢個MV更加「典型」。留意下啲燈，仲有煙霧，仲有呀倫伯玩Mic Stand（抄 The Final Countdown？留意係同一年嘅東西，1986，但當呢啲啲玩Mic Stand好似都幾常見）   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 6，一生中最愛。三十歲以上你唔識嘅，「你諗下自己係咪香港人」。真的，呢首係紅到不能無視嘅歌。 呢首，應該不用多講吧。倫伯真正傳世之作。廿年後有冇人唱我唔知，但至少而家仲成日有後生唱。 我甚至懷疑，非官方統計，呢首係倫伯近年（？！）最紅嘅歌。I mean，後生啲嘅會識《愛情陷阱》，但你唔會走去唱的。但《一生中最愛》，我仲久不久聽到有人唱K唱，甚至街頭唱（直到倫伯變咗撐警廢老為止就冇人敢唱）。（而家楊千嬅 陳奕迅 容祖兒都唔唱得，點算？）（寫文時樓下先唱緊《灰色軌蹟》，好事，因為你大可以無視剩返嗰幾條友，只係致敬黃家駒）（我算係Beyond歌迷但你見我唔會叫「家駒」，總覺得好怪。正如我唔會寫「克勤」「祖兒」，甚至唔會寫Eason） 亦即係話，你問我地年代嘅，揀一首代表作，未必呢首。但你問後生啲，三十歲嗰堆，照計佢地就講呢首。 講真，點解會咁？我都唔知。有啲歌，例如《海濶天空》咁，你知道點解傳世（但當然後來變咗恥笑左膠就另一回事）。又或者，《紅日》《告別校園時》《陀飛輪》《單車》《Shall we talk》咁，明顯因為歌詞同埋首歌嘅主題。 但《一生中最愛》呢？ 普通嘅情歌一首，詞亦唔係填得特別好（sorry 向雪懷）。雖然句「寧願一生都不說話 都不想講假說話 欺騙你」流傳甚廣，亦係填得好。但成首歌填詞並唔係你會拎嚟做教材嘅神級之作。 首歌當然紅，當年都好紅。但估唔估到會今日仲咁多人識？我當年就估唔到啦。 係乜嘢，令到呢首歌今日甚至反而比《愛在深秋》《幻影》之類更加紅？ 係咪套戲？《雙城故事》相當好睇。好感人，睇到喊的。 Again，夢幻組合，台前幕後都係。張曼玉恰如其份，紅星倫伯（嗰時都四大天圶了），但拎影帝嘅係你以為做諧星嘅曾志偉。陳可辛導演，李志毅編劇，馬楚成攝影（佢自己導演啲戲膠就另一回事）。歌呢？好多都係倫伯自己，即係關維麟。 但，三十年後，我唔覺得有好多人講呢套戲。首歌完全outlast 晒套戲。 當然，我估倫伯成日（應該每一次都係？）在左麟右李唱，都係一個原因。But still． 我估，quite simply，「係因為個歌名」。Boom。同《你的名字我的姓氏》一樣。呢首《一生中最愛》，作為求歡，求愛，求婚，應該都幾好用。 「喂啲歌詞有啲問題喎」。唔重要啦，香港人嘅嘢。個個父親節唱《單車》都係咁。 Anyway，作曲嘅係伍思凱。不過，呢首唔係改編