Day 6，一生中最愛
Day 6，一生中最愛。三十歲以上你唔識嘅，「你諗下自己係咪香港人」。真的，呢首係紅到不能無視嘅歌。
呢首，應該不用多講吧。倫伯真正傳世之作。廿年後有冇人唱我唔知，但至少而家仲成日有後生唱。
我甚至懷疑，非官方統計，呢首係倫伯近年（？！）最紅嘅歌。I mean，後生啲嘅會識《愛情陷阱》，但你唔會走去唱的。但《一生中最愛》，我仲久不久聽到有人唱K唱，甚至街頭唱（直到倫伯變咗撐警廢老為止就冇人敢唱）。（而家楊千嬅 陳奕迅 容祖兒都唔唱得，點算？）（寫文時樓下先唱緊《灰色軌蹟》，好事，因為你大可以無視剩返嗰幾條友，只係致敬黃家駒）（我算係Beyond歌迷但你見我唔會叫「家駒」，總覺得好怪。正如我唔會寫「克勤」「祖兒」，甚至唔會寫Eason）
亦即係話，你問我地年代嘅，揀一首代表作，未必呢首。但你問後生啲，三十歲嗰堆，照計佢地就講呢首。
講真，點解會咁？我都唔知。有啲歌，例如《海濶天空》咁，你知道點解傳世（但當然後來變咗恥笑左膠就另一回事）。又或者，《紅日》《告別校園時》《陀飛輪》《單車》《Shall we talk》咁，明顯因為歌詞同埋首歌嘅主題。
但《一生中最愛》呢？ 普通嘅情歌一首，詞亦唔係填得特別好（sorry 向雪懷）。雖然句「寧願一生都不說話 都不想講假說話 欺騙你」流傳甚廣，亦係填得好。但成首歌填詞並唔係你會拎嚟做教材嘅神級之作。
首歌當然紅，當年都好紅。但估唔估到會今日仲咁多人識？我當年就估唔到啦。
係乜嘢，令到呢首歌今日甚至反而比《愛在深秋》《幻影》之類更加紅？
係咪套戲？《雙城故事》相當好睇。好感人，睇到喊的。
Again，夢幻組合，台前幕後都係。張曼玉恰如其份，紅星倫伯（嗰時都四大天圶了），但拎影帝嘅係你以為做諧星嘅曾志偉。陳可辛導演，李志毅編劇，馬楚成攝影（佢自己導演啲戲膠就另一回事）。歌呢？好多都係倫伯自己，即係關維麟。
但，三十年後，我唔覺得有好多人講呢套戲。首歌完全outlast 晒套戲。
當然，我估倫伯成日（應該每一次都係？）在左麟右李唱，都係一個原因。But still．
我估，quite simply，「係因為個歌名」。Boom。同《你的名字我的姓氏》一樣。呢首《一生中最愛》，作為求歡，求愛，求婚，應該都幾好用。
「喂啲歌詞有啲問題喎」。唔重要啦，香港人嘅嘢。個個父親節唱《單車》都係咁。
Anyway，作曲嘅係伍思凱。不過，呢首唔係改編歌。特登為呢套戲寫的。
BTW，嗰隻碟，我係有買的，唔係叫《一牛中最愛》，係叫《神話1991》，當然係日聽夜聽，去旅行（學校旅行啦仆街）都拎個Walkman去聽的。呢隻碟無甚特別，特別在，啲歌都幾唔啦更，乜都有。不過嗰個年代嘅廣東碟係咁的。又唔會十隻都係慢情歌咁。
同碟仲有好出名嘅歌，《明天你是否依然愛我》，佢同關淑怡合唱。但我唔肯定廣東話係咪佢兩個最初唱。
1986年林憶蓮已經翻唱, 歌名叫《明天是否愛我》, 收錄於《放縱》專輯.
回覆刪除