倫伯（當年）真係好撚紅

  Day 64，今夜情為証 容許我連續貼兩隻《神話1991》（aka《一生中最愛》）呢隻碟入面嘅歌 因為呢個MV 嘩，不得了，各位觀眾，魔童老母，Chi Lam老婆，當時剛選完港姐不久嘅袁詠儀。長頭髮，相當少見，有今生冇來世。 on an unrelated （?）note，之前貼過，蔡少芬都有拍過倫伯MV。嚟緊仲會有李嘉欣。不過好似冇洪欣，搵到話你知。 作曲嘅係殷文琦，嗰個年代作好多歌，張學友李克勤劉德華都好多。原來早兩年死咗，仲係好後生，五十幾歲就香咗。 最出名嘅作品應該係…… Michael Learns to Rock（！）嘅Take Me to Your Heart，即係，張學友嘅《吻別》 但呢首《吻別》並唔係我心水，我最鍾意嘅，應該係《忘情冷雨夜》（睇返資料，原來都唔係幫張學友寫咗好多歌，但就好記得呢兩首）   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 63，明天你是否依然愛我。 可能同好多人估計唔同，呢首歌係幾「後期」嘅作品，不過如果心水清嘅，見到關淑怡已經知。 隻碟叫做《神話1991》，當然就係1991年，而中一嘅我，係用自己錢買嘅，結果在個Walkman　日聽夜聽，嗰年學校旅行去銀礦灣定乜鬼，不停咁聽（冇乜朋友嘛），所以有排貼。呢隻亦即係《一生中最愛》嗰隻碟。 雖然好多人都知我鍾意關淑怡，但呢首歌並唔係私心選，實情以前我好似從來冇貼過。 但，呢首歌，都實在好紅。原曲可能更加紅，唔少人改編過 先講作曲嘅係童安格，但我一路以為佢係「原唱」，而嚴格上又唔係。 今日先知，冇錯係童安格作曲，但最初唱嘅，係個叫王芷蕾嘅台灣女歌手，後來童安格自己又唱翻（呢類現象好常見） 咁然後，香港都有其他人改編過，林憶蓮都唱過，但我都唔知。 我就只係聽過童安格，同埋呢個版本。 咁留意啦，唔同版本，男人唱又有，女人唱又有，合唱都有。 去到倫伯版，並唔係特別好聽。因為呢首歌本身都唔係合唱，咁搞到一男一女合唱，大家嘅音域就有啲難就。 不過「我信你的飄到　是個天故意去創造」，嗰段就合唱得好嘅。 另外講埋填詞，係之前都提過，填《淩晨一吻》嘅盧永強。咁係睇到用字係「老」啲，文雅啲。例如填「巍巍」「瑰寶」，呢啲都唔係後來啲友填詞常見到嘅字。整體我覺得還不錯。 呀當然仲有，呢個MV，當年仲係好得嘅關淑怡，仲未變愉景灣知名居民。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 62，都市獵人 好，貼完熱門歌，又整首冷門嘅。呢首你識嘅話我知，完全冇plug上台，好似後來都唔覺有唱過。留意係都市獵人，唔係城市獵人。 同早兩日貼嘅《變奏》同一隻碟，即係《擁抱》嗰隻碟。1988年，唔攞獎後嘅碟。見到係更多新嘗試，亦可以話慣性收視，又冇壓力，玩乜都得。 呢隻歌同《變奏》相似在，都係倫伯自己作曲。唔止，填詞嘅都係陳少琪。但奇怪在呢首歌佢用自己名，《變奏》就用筆名「雨言」，原因不明，明明同一隻碟。 歌嘛，冇乜特別的，倫伯作曲，大路嘢，都係嗰啲。填詞有點心思，幾有「畫面」，「炎夏裡穿起這冬季大衣　路過的都取笑我做傻事」「沿路裏　粉筆去寫我歷史」「沒料到　熱愛就此了事　要記載於報紙」   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 61，忘不了你 呢首嘛，即使在倫伯嘅歌當中，都算係相當經典。但係極之早期嘅歌，1981年，甚至佢都未真係點紅。早過咩《雨絲情愁》《小生怕怕》 之類，更早過咩《幻影》《霧之戀》《愛在深秋》嗰堆。 唔少人都知，隻歌改編日文歌，五輪真弓，我就覺得勝過原唱的。可能先入為主，但你可以留意下，嗰期啲日文歌改編做廣東歌後，啲節奏係有啲改動的（反而到後來安全地帶嗰啲就真係好接近原版） 不過，呢隻碟（就係叫《忘不了你》）就只係得呢隻改編日文歌，亦係呢隻歌叫做成功，先開始成個香港改編日文歌嘅風潮。 然後又要講，你話倫伯「只係靠日文歌」咩，又未必。呢首歌，蔡楓華都有改編。正如後來《酒紅色的心》，都係齊齊改安全地帶。但你見跑出嘅係倫伯。係咪因為靚仔？就應該唔係。 而家講大家應該會笑，但當年，講外型，啲女肯定係鍾意蔡楓華多過倫伯，唔信問下你阿媽。 講下隻歌，林敏聰填詞嘛，呢隻碟都未大紅，後來《幻影》之類就紅到爆。難怪佢不可一世，覺得自己世一，不停指點江山。 而呢首都係填得幾好的，冇乜好冷僻嘅字，但恰到好處。「如何喜歡你　如何結識你」「誰與我終生依戀　誰給我真心不變」，用嘅字全部好簡單，好易記。 呀仲有，唔少人都知，周一嶽版。我又再聽多咗次。又係嗰句：咁你都話唱得好差，你真係未聽過人五音不全。我估你求其一個普通網友去唱，照計都唔會好過周生。唱LIVE喎（好似係？） 呢首歌係有點難搞的，音域唔係好廣，所以唔係呢個問題。而係啲節奏有點…..奇怪，唔係典型嗰種縫拆拆一二三四節奏。普通人真係唔好走去唱LIVE。你自己彈自己唱，就可以就到，或者如果LIVE BAND，有經驗又唔玩你嘅，會就返你。但你播音樂唱嘅，就最危險，唔少人都係唱到入錯晒的。唔信你可以試一次。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 60，變奏 都話玩到100日絶冇問題，好多金曲都未出。呢首可能算係「冷門」啲？但因為有呢隻碟，所以成隻碟識晒。 隻碟係1988年嘅《擁抱》，宣佈唔攞獎後。之前貼過嘅《午夜皇后》，《千金一刻》《水中花》都係呢隻碟。而隻碟最紅嘅兩首歌我都仲未貼，死未。 呢首私心選，後世流傳唔係好多，冇乜太多人講。雖然佢演唱會有唱過（我發現好多歌佢都有唱過下）。 非常大路嘅AA’BB’ AA’BB’ B’曲式，倫伯自己作曲。填詞嘅係「雨言」，剛剛Google先知，即係陳少琪。 因乜鍾意首歌？唔知喎。可能係個由簡單到複雜嘅編曲，又或者係最後兩次B’之間嘅間奏。又或者，只係因為日聽夜聽。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 59，明天仍要繼續 又係出賣年紀之作，並唔係我特別鍾意嘅歌。好多人可能聽都未聽過個歌名，但一播，係嗰個年代嘅，自然會識。 因為，套電視劇好紅。套劇叫做《他來自江湖》，1990年 As said，1990年，倫伯已經神枱級，1998年唔攞獎，但1990年仲係一年出兩隻碟咁，一隻碟紅四五首歌咁，李克勤實在多得佢唔少。 呢隻碟係《夢幻舞台》，即係《卡拉永遠OK》嗰隻。 而更加神奇嘅係，原來套劇嘅插曲，係《親親》。張學友嗰首。我諗，其實我真係冇睇套劇嘅（好似真係冇，但就係唔睇都會識主題曲）   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 58，遲來的春天 呢首，當然當年係金曲，直頭係主打。但，後來好似係少人談論的。40歲以下嘅識唔識？ 極早期嘅歌，1983年，隻碟叫做《春...遲來的春天》，當然我屋企係冇的。（應該之後《霧之戀》《愛的根源》《愛情陷阱》屋企就有了）。聽講個唱片封面，都係馮添枝自己拎部傻瓜機影。實情唔止一隻碟係咁。 貼呢隻歌時，我係唔記得邊個作曲同填詞嘅，結果我估係本地創作，同埋林敏聰填。兩樣都錯。林敏聰云云，嗰個時期，估係佢填冇乜走雞，但結果係向雪懷填。都唔係真係好分到，嗰個時期嘅林敏聰填詞仲係好正經的。 作曲嘅，因幡晃，冇錯係改編日文歌。但同好多人估嘅唔同，實情成隻碟就只得呢一隻係改編日文歌，反而好多仲係改編英文歌。睇咗咁多日文，應該知道嗰期嘅香港流行曲歷史，係到再遲少少先全城齊齊改編日文歌的。 呢隻係倫伯單飛第六隻碟，開始上到一線。《幻影》都係呢隻碟，但後來《霧之戀》隻碟再錄過另一個版本的。 首歌嘛，反而我係想講歌詞。咁細細個，當然都知道講情情塔塔嘢。但就真係唔明嗰個「遲來的春天」嘅比喻。真係填得妙呀。 欣賞下啲歌詞，嗰個年代都係含蓄啲。講嘅，大約係不為世俗眼光接納嘅……禁戀？但冇寫得好清楚，係出軌丫，定兩個加埋百幾歲先學人談情說愛？總之講嘅，就係遲來的愛情咯。講主角嘅掙扎。 「遲來的春天　不應去愛　無奈卻更加可愛　亦由得它開始又錯多一趟」，就係呢種「明知錯但都係控制唔到自己」，當然你亦可以包裝做「幾廿歲人唔好咁多性幻想」，「七十歲嘅阿伯仲食粉絲仲話要初戀」，narrative 啫   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 57，愛到你發狂 原來又甩稿幾日，再急起直追先。 呢首歌嘅煩厭或者洗腦程度極高，嗰個年代嘅固然實識，唔係嗰個年代嘅，照計聽半次都識跟住唱。實在首歌係冇乜歌詞同旋律嘅，黃霑有冇填咗兩分鐘？副歌（？）仲要係跟返原曲英文歌詞。但黃霞幾句詞，將首歌嘅洗腦度再提升。我其實係好厭惡呢首歌的。 亦都好大程度係聽結他同鼓，唔係聽人唱。咁當然聽原版會好啲。 又，鍾意嘅，亦可以搵返《歌者戀歌》入面嘅版本。呀倫伯跳嚟跳去咁。因為條女（林河廷，堅靚）在沙灘（？）寫「Sharona」，於是以為條女叫Sharona，就唱呢首歌。擺明係有咗首歌先搵情節去就。然後，原來條女唔係叫Sharona，係叫Marianne，所以之後就有《捕風的漢子》　。 我實在不能將呢首歌由頭聽到尾。應下節，送畀大家呢個《愛到發晒狂》＋《喜氣洋洋》（熱烈地彈琴熱烈地唱）嘅混合版。我都係第一次聽。冇錯係在日本，唱啲咁嘅嘢（而好多人都知，《喜氣洋洋》就係改編五輪真弓，不過係小鳳姐，唔係倫伯） 好早期嘅作品啦，仲係花靚仔   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

  Day 56，恭喜發財 冇錯，首歌就係叫《恭喜發財》，同名電影嘅主題曲。插曲叫做《我愛世界》，Day 27 貼過 呢套冇錯係賀歲片，1985年，倫伯有份。而我居然係冇睇嘅。之前寫《我愛世界》都有講，套戲同《聖誕快樂》差不多不雞兩味，好多道具同人物設定都一樣。《聖誕快樂》就1984年尾，呢套就1985年頭，應該一齊拍，都係新藝城。一套就麥嘉，一套就石天。一套張國榮，一套倫伯。一聖聖誕，一套新年，食晒所有票房。 呢首歌甚至黃百鳴自己填埋詞，唔止，《我愛世界》都係佢填。 呢首歌嘛，都係《愛情陷阱》隻碟。 然後到2010年，又整咗套合拍片，《財神到》。倫伯做財神。相當爛下，但反而我有入場睇。   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch

Day 55，雨夜的浪漫。 較早前網主做手術，甩咗幾日，慢慢補返。 一不離二，二不離三。連續兩日都貼《愛情陷阱》隻碟嘅歌（《最愛的你》，《此刻你在何處》），今日繼續。亦證明隻碟真係幾咁紅。 呢首應該係隻碟第二流行嘅歌。但我係唔鍾意嘅。 不過真係搵返呢個MV，完全唔明做乜無啦啦返屋企返到一半打茄輪。你要知首歌1985年，民風仲係好保守，即係唔會咁易一街見到人打茄輪的。 仲有，向雪懷填嘅詞，我當然鍾意《愛的替身》同《雨絲情愁》多啲，但呢首勁在，真係成首詞只係填打茄輪！　（又，向雪懷原來真係填好多倫伯，遲下做個統計） 作曲嘅，冇錯，又係鈴木喜三郎，《霧之戀》《愛的替身》《最愛的你》嗰個。呢首亦係改編歌，原曲唱到好似演歌咁（定根本係演歌？）   我 Facebook Page： fb.com/ivanliresearch 我 Patreon： patreon.com/ivanliresearch 我 IG： instagram.com/ivanliresearch